توبة من دي النوبة

من أحلى الاشياء اللي تسويها انك تحاول تطير على الخطوط الجوية الكويتية الناقل الوطني لدولة الكويت .. تحس ان الطيارة فاتحتلك بيبانها وترحب فيك تحس انك داخل بيتك .. ولكن تنسى بنفس الوقت النسرة اللي ناطرتك بالعصاة البلاستك السودة مالت تركيب البيوت ايام قبل يوم كنا صغار .

الوجهة : القاهرة
المدة : 12 يوم
المهمة : دورة تدريبية
وبما أني موظف حكومي فإني مجبر أخاك لا بطل على اختيار الخطوط الجوية الكويتية .

أحجز على الطيارة اللي رايحة القاهرة يوم السبت .. وبما انه في طيارتين الساعة 2 والساعة 6 حجزت على الساعة 6 عشان آخذها على الراحة وخاصة اني مسافر بروحي وقاعد فترة .

القاهرة في الصيف لا تطاق .. الجو حار وزحمة ألمان وخليجيين وما تجود به انفسهم من المتردية والنطيحة .. هذا غير شعبها اللي مالي البلد ووسط البلد .. لا ويسمونها ام الدنيا الجلحة الملحة ... بس بنفس الوقت تلقاها ظريفة مثل ظرافة انتصار الشراح في بشت المدير ..

المهم تغيرت الخطة فـ حدرت من الشاليه على غير العادة يوم السبت بالليل لزوم تقديم الولاء والطاعة في البيت ولدواعي تقديم مراسم الوداع اللتي تستمر يوم وليلة مع أمي .. بالمناسبة مراسم الوداع تتم حتى لو كانت السفرة مدتها يوم واحد ... كم من الأمهات مثل أمي ؟ وكم ولد وحيد مثلي ؟

المهم نرجع لمحور حديثنا .. أقعد الصبح على الراحة يوم السبت واتغدا بالبيت لزوم استكمال المراسم واصير خوش واحد الساعة 3 ونص انا بالمطار .. اجراءات السفر وايد سهلة وتحس انك ملك ودلع علآآآخر .. بس اختم جوازك تطالع الشاشة اللي عند البوابة يقولون لك تعال يالصيدة ..



الوضع سليم لي الساعة خمس ونص والصراحة كان على غير المتوقع .. لأن المتوقع اذا انت مسافر على الكويتية تأخير ساعتين انت بالسليم .. وما عدا ذلك تطلع انت من القلة المحظوظين .. طبعا اذا ما كان عليها تأخير .. المهم اشوف اللي قاعد يمي يقوللي انا من العشر بالمطار رايح جدة ليلحين ما طرت .. وانا اقول بقلبي الله يعين التأخير حايشنا حايشنا .. طبعا مو تشاؤم بس من سجل تجارب سابقة كثيرة .. المهم بعدها بخمس دقايق يعلنون ان طيارتنا متأخرة ثلاث ساعات يعني لي الساعة 9

حلو الكلام يعني الوقت محدد الساعة 9 احسن من ما يعلقونا ما ندري متى نطير ..


اسمع الخبر بابتسامة واطمن نفسي بحسبة بسيطة ان ما وراي شي وان الساعة 9 نطير نوصل 12 انام 1 والقعدة الساعة 8 حلوة .. هذا اذا كانت تطير 9 .. وخاصة اني حاسب حسابي الايبود مشحون عالآخر واللابتوب كذلك .. سبل الراحة متوفرة

ومنها تمشي بالمطار اللي من اوله ما تشوف آخره رايح راد لو ناوي جان كملت عمرة والحمد لله .. وانا اتمشى اكتشفت شي مو موجود بالعالم .. تكنلوجيا ما وصلت حتى فنزويلا ايام عزها .. جهاز للكشف عن وباء عالمي من الدرجة السادسة شكله مثل الروبوت بس هالمرة على غرار محطات البانزين عندنا Self Service


اللي صار طيارة جدة اللي تأخرت ما طارت فاستعانوا بصديق واحنا من زود الميانة عطيناهم طيارتنا .. طاروا فيها الساعة 8 واحنا نطرنا تأشيرة لين وصلت طيارة ثانية بس هالمرة فيها مشكلة .. واحتمال يلغون الرحلة لأن الطيارة ياية من لندن وخربانة !! وبين الغاء وصعود ثلاث ساعات صار حب خشوم واذون وتكرموا علينا وصعدونا الطيارة الساعة 12 .. وطارت وصلنا الساعة 2 ونص الساعة 4 انا بالفندق 5 نايم بعد اخذ شور سريع لزوم الاحلام الحلوة .. انتهى

ومنا إلى عمادة القبول والتسجيل ..

الحصيلة :
قهر على تردي حال مؤسسات الدولة والتي من اهمها الخطوط الجوية الكويتية
كل من قابلتهم بالمطار سواء كويتيين او اجانب يرثون حال الكويت وما وصلت اليه
حرب نفسية وطائفية واجهاد نفسي وبدني كبير
باكيت زقاير طار خلال 9 ساعات